19 MEERT 2022, KASTEEL AMSTENRADE,
Mevrouw de gravin, erebesjtuur, besjtuur, officiere en mansjappe van de sjötterie, daames en heere sjöttersvrunj.
1987 waor mien eesjte jaor biej de sjötterie – dat is noe 35 jaor geleijje
Mit ein grote tössjepauze ben ich in totaal 14 jaor -mit vööl plezeier en ups en downs – lid van de sjötterie gewaes – mit 4 jaor es keuning. Dit om mer aan te gaeve, wie sjterk miene banjd mit dees vereiniging is. En wie bezunjer ´t is dat ich noe nao die 35 jaor zo veur uch sjtaon, van gewaerdraeger – keuning tot sjirmheer.
Sjötterie is saamhorigheid, kammeraadsjap, gezelligheid. De sjötterie is familie en vrundsjap in ein. Ich sjloot mich indertied aan bie St.Gertrudis omdat mich auch de greutsjigheid en t eigewieze karakter van vööl sjötters aansjprouk. En ich ben dao neit in teleurgesjteld.
Natuurlik, es t ens eine keer lestig geit, kent die eigewiesheid zich auch taege dich keere en de sfeer bederve. Geer höb dao de aafgeloupe tied es vereiniging de neudige las van gehad . En dan waor d´r auch nog corona.
Wie sjiek is t dan dat veer hiej weier aangetreejje sjtaon. Veur t eesj weier optrejje es complete sjötterie, in uniform en vol ornaat, in ´t eige dörp. T geef t zelfde gevuil es wienee de kui van de boer veur t eesj weier de wei ingejaag waere. Ze weite van gekkigheid neit wie ze t höbbe, zo´n lentekriebels motte veer noe auch höbbe.
Laote veer haope dat veer vanaaf noe ech veuroet kenne kieke en de draod weier kenne oppakke mit deilname aan sjöttersfeeste en t opnuu wirke aan ein hechte club vol vrundsjap en saamhorigheid, es geweldige ambassadeurs veur de gemeinsjap van Austrao.
Realiseer uch dat dat neit vanzelf geit. Zeker noe in t begin, es de repetities weier opnuuj opgesjtart waere en es veer die eesjte keere weier oettrekke, dan mot veer mesjiens weier eine drempel euver. Mer wie leuk is t , mit de lentekriebels in de boek sjtap veur sjtap te boewwe aan de vorming van ein hechte club, neit besjtaonde oet 50 individueel karakters, mer 50 kammeräöj die veurein door t vuur gaon.
Dat geit neit vanzelfsjpraekend, dat vreeg noe van uch allemaol get extra´s. Ich neudig uch oet allemaol dat extra sjtepke te zette, neit allein veur de power en oetsjtraoling van de vereiniging , mer auch veur uch zelf, om nog meer te kenne geneite van uch lidmaatsjap van dees sjoon Traditionsverein. Opnuu ein hechte sjötterie maake mit alles d´r op en d´r aan, sjtrak biej optrejjes, en mit vööl sjpas en gezelligheid. Es veer dat plezeier auch nao boete oetsjtraole en de luuj van Austrao dao aan laote pruive, dan zulle ze van zelf weier meer geïnteresseerd raake en zich wille aansjloete. T besjtuur is dao op ein gouw meneier mit bezig en ben bliej dat ich hun dao biej ken sjteune.
Ich bedank mich zeer dat geer zo unaniem, mit z´n alle, ingesjtömp höb mit dees benuiming tot besjermheer. Ich vuil t es ein grote eer en tegeliek ein grote verantwoording. Ich belaof dat ich dees bezunjer taak mit vööl respek en inzat zal gaon vervulle en dat ich mien uuterste bes zal doon om ein waardig ambassadeur veur St. Gertrudis en de gemeinsjap van Austrao te zeen. Es get is, kent geer altied biej mich terech, neit allein t besjtuur en erebesjtuur, mer auch geer es officiere, mansjappe en muzikante van de sjötterie. En omdat ich ´t zo´n eer venj, en omdat ich dat auch nao boete wil oetsjtraole, höb ich gemeind mich dit nuuje pak te laote aanmaete, door eine sjnieder in Malaga, es uuterlik signaal veur de waardigheid van mien nuuj functie.
Dames en heere,
Eine gouwwe besjermheer is eine dae´ste zo min muigelik zuus, dae dich neit veur de vuit löp. Mer dae es t neudig is biej taegewenjd, direk dao is veur advieze of anger vorme van daadkrach en oplossinge. Ich zal zeen es ein muuske, meistal onzichbaar, mer altied in de buurt. En es t geit om ein sjterke toekoms, en nuuj invöllinge van de sjötterstradities en feeste, dan zal ich neit naolaote op de trom te hauwwe en mien meining te gaeve.
Nogmaals dank veur dees eervolle benuiming, ich gaon mien sjtinkende bes doon om dit te laote sjlaage.
Lang laeve de sjötterie! Lang laeve St. Gertrudis! Lang laeve Austrao!
Hieperdepiep hoera!
Lei Meisen, sjirmheer van St. Gertrudis Amstenrade